Prashna

Kya hai woh?
Jo mujhko Jode tumse
Tumko jode mujhase
Ye hai sahaj vishwaas.


Kya dekhoon main?
Har pal dikhati tum hi
Tumse itar kuchh nahin
Ye kaisa aabhaas.


Khush hooon kya?
Tumse miloon khil jaoon.
Dur jaoon murjhaoon
Ye kaisa ullaas.


Pyaar karoon main?
Roj naye udgaar.
Nit seema vistaar.
Ye sab bina prayaas.


Tumko Dhundhoon?
Kaise jhankoon bhitar.
Tera aks hai andar
Tum ho mere paas.

Ehsaas

Ye Baatein.
Mann ki baatein.
Tum ho mann mein,
mann sundar hai.
Mann khush kyun hai?
tera ghar hai.
Chhota ya bada
par sundar hai.
Sapnon si bani, phholon se saji
Bhaavon se bhari, kuchh kuchh behki
Kya kahte ise? Main kya janoon?
bas janoon yeh hai tere liye
Dil mein dhadkan hai tere liye.
Thoda sa darr hai tere liye.
Kuchh mann mein kasak hai tere liye.
Andekha safar hai tere liye.
Aankhon mein nami, hothon pe hansi.
Mithi si chubhan, thodi si khushi.
Pyara ehsaas sab tera hai
Dheron vishwaas sab tera hai
Din-raat ka manzar tera hai.
Bhaavon ka samandar tera hai.
Woh khat bhi tere naam ke hain
Jo bheje maine kore hain
Aur unko bheja maine hi
Jo khamoshi se poore hain
Wo waqt bhi saara tera hai
Jab main akela hota hoon
Tum raho- na raho saath mere
Main aks tumhara chhuta hoon
raton ko baatein hoti hain
jaago to baatein hoti hain
So jao to sapne mein
Bhi mulaakaatin hoti hain
Tum ho to mera hona hai.
Tum na hote to kya hota
Hota main tab bhi, lekin
Hone ka matlab kya hota?

Aage kya karoon?

He priye, main prem ka vistaar aage kya karoon?
Bas tumhin ho, ab kisi se pyaar aage kya karoon?

Jab bhi hoti koi icchha, tum hi hoti kendra mein.
Apni Icchaon ka vistaar aage kya karoon?

Ye samundar hai, na koi tat na koi kinaara.
Bhatakta hoon, ab bhala nistaar aage kya karoon?

Ye kashish hai jo, bala hai. Rog hai ye lailaaz.
Kya karoon main, iska ab upchaar aage kya karoon?

Yun bhi gujare hain hamare din bina sampark ke.
Roke hai humko kathin sansaar aage kya karoon?

Dhundhata hoon koi tinka jo mile is dhaar mein
Main pada hoon is samay majhdaar aage kya karoon?

Hai musibat beech mein is raah ke to bepanaah
Chal chuka hoon, ab bhala inkaar aage kya karoon?

Sapne sachhe ho sakein; tha iska mujhe intejaar
Ho chuka un sapnon ka deedaar aage kya karoon?

Jane kya deewanapan hai, sochana har pal tumhein
Kahani kewal tum tak hai, kirdaar aage kya karoon?

Kavitaaon se baat

Ai Ajanmee putriyon
Yeh samarpan tumhare liye
ki ab main clinic nahin jaoongi
Main doctor aur hatyaare ko
ek na banaoongi

Tum Aao.
Swagat hai tumhara.
Aakhir tum meri hi to ho.
Phir chinta kaisi?
Rok kyunkar?
Inkaar kyun?
Sweekaar ho mujhe tum
jab aana chaho, tab.
Apni samast chetana mein
mera yeh nimantran
Tumhaare liye.

Aakhir main bhi to hoon MAA.
Maine bhi jheli hain prasav peeda
maine gadha hai roop tera
Aur ab, tujhe bachane ko
Leti hoon Pran
Na hone doongi bhroon hatyein
Mere dwara.
Yeh samarpan tumhare liye.

Baadal

Ai Baadal !

Tumhein to udana aata hai na?
Tum to wahi paani yahan barsaate ho
Jo kahin bhi aur.
To suno, mera ek kaam karoge.
Jab jana na wahan
To unase kehna
Teri baarish mein bheegein.
Maine apna sparsh tumhein udhaar diya

Kehna ki en boondon ko maine chhua tha.
Aur jab lautana, to apne matmaile paani mein
Unki bheegati tasveer jaroor bharke lana.
Mujhe accha lagega.

Main bhi dekhunga
Meri ungliyaan Unke jism ko chhoote waqt
Kaisi lagti hain.
Aur, woh kaisi lagti hain
Mere sparsh se pahle
Aur mere sparsh ke baad.

Aur dekho, agar woh bheegana na chaahein.
To mat bheegona unhein.

Tab sochunga
sharm aati hai unhein
Meri chhuan ka udhaar
Kisi aur se lete.

Dekho, zid mat karna.
Aur, laut kar aana jaroor.

Aa gaye hain hum jahan
wahan se aage raasta
Yahin kahin chhupa pada
Padega use dhoondhana.

Ehsaas-7

Tum kya mere ghar aaye the?
Phir kisne rakhe the haath meri mundi palkon pe
Woh kaun sa tha ehsaas
Jab muje laga ki tum ho
Jabki main janta tha ki tum nahin ho.
Main sidhiyon tak gaya tha dekhane tumhein
aur tumhein na paakar bhi
lauta tha khushi-khushi

Kyunki.
Mujhe kuchh dikh gaya tha.
Meri kalpana mera ehsaas ban gayi thi

Meri duniya ne is duniya ko jeet liya tha
Mere sapne mera sach ban gaye the.
Mere sapne jeet gaye the.